أكد الرئيس عبدالفتاح السيسي رئيس الجمهورية، أن معدلات التقدم في الجيش والشرطة لم تتوقف في أصعب الأوقات وفي أكبر نسب خسائر اتحققت لم يتوقف أبدا جندي ولا ضابط صف ولا ظابط والمعدلات يمكن تكون زادت حقيقي ، الشعب اللي يعمل كده بيكون ربنا بيساعده وكل شيء يهون لكن تفضل البلد دي نبنينها ونكمل بناء مش نحافظ عليها بس لأن الحفاظ بس مش كفاية.
وجه السيسي خلال كلمته في الاحتفال بيوم الشهيد التحية إلى أسر الشهداء ، وقال : خلوني أبدا كلامي بتوجيه الشكر والتقدير والاعتزاز والتحية لأسرة كل شهيد وأسرة كل مصاب والحقيقة كنت عايزكم تسمعوا الكلام اللي بيقوله أسر الشهداء، كلام عجيب والله إن هما بيتكلموا كده.
وأضاف السيسي مكنش ممكن أبدأ كلمتي إلا أما أقول طالما إن مصر فيها شعب وأسر وهما زينا واللي راح سند وضهر وضنا، كل كلمة تتقال كلمة طيبة ومستعدين نقدم أكتر والأب يقولي وأنا كمان من فضلكم نحييهم.
وتابع السيسي : الأغنية اللي فاتت كانت بتتكلم عن الشهداء قدموا أرواحهم ودمائهم و المصابين قدموا جزءا من أجسادهم عشان تفضل مصر والكلام ده أنا قلت فيه إن العهد مننا ، أن زي ما هما حرصوا إنها متضعيش احنا كمان نحرص على. أنها تفضل موجودة بما يليق بدم كل شهيد وروح كل شهيد.
واستكمل قوله : لما بدأت معركتنا في 2013 و2014 ولغاية شهور قليلة مضت كانت الناس بتقول هو الموضوع هيفضل على طول كده ولا إيه هو الكابوس ده هيفضل كده ولا إيه وياخد أولادنا.
وأضاف : كنت واثق من ربنا سبحانه وتعالي لا يمكن أبدا أهل الشر ينتصر على أهل الخير مهما كان بشاعة وقسوة وغباء وجهل وعدوانيتهم أنها تنجح في النهاية الخير هينجح.
ومن ضمن الكلام اللي اتحركنا فيه يا تري نحاربهم والبلد تستني كده ولا نحاربهم والبلد نبنيها كده ، القرار كان نحاربهم ونبني ونشتغل واحنا بنقاتل وده كان من فضل ربنا علينا.
وتابع السيسي : اللي اتحقق لو شايفينه كتير هو قليل جدا من المستهدف والمطلوب بس عايز أقولكم إن الظروف اللي بتمر على الدنيا واحنا جزء منها بتقول إن المسار ده لو احنا كنا بنفكر نعمله دلوقتي مش هكون مبالغ لو قلت إن التكلفة هتكون ضعف اللي تم خلال السنين الماضية وده له من دم أبنائنا.