كشف وزير الإعلام أسامة هكيل، أن تطبيق حظر التجوال في مصر وارد وله وقتها وقد يكون جزئيا أو كليا ضمن إجراءات مواجهة كورونا .
وقال وزير الإعلام في مداخلة مع الإعلامي أحمد موسى ببرنامجه “على مسؤوليتي” :الناس بتطالب بحظر التجوال، حاجة لطيفة أوي إن الشعب بيطالب بحظر تجول، ده وضع غريب شوية وإحنا عملنا موضوع قفل المحلات ده كخطوة أولية لموضوع حظر التجول”.
وأضاف: “إنما حظر التجول هيترتب عليه إن حتى محال المواد الغذائية مش هيشتغلوا، مش كل الناس ثقافتها واحدة وبالتالي حظر التجول وارد في الإجراءات وله وقته، وإن شاء الله نشوف بس الدنيا هتمشي لفين”.
وتابع: “حظر التجول حتى إذا تم مش هيقعد 24 ساعة، بيتم 12 ساعة أو 10 ساعات مثلا أيا ما كان، إنما المهم إنه هيبقى فيه جزء تاني من الوقت الناس بتمارس حياتها بشكل طبيعي، وبالتالي كاننا ماعملناش حاجة”.
وأكد أن “الإجراءات اللي بتتعمل دي كلها الحكومة لم تقصر فيها في شيء إنما من غير ما المواطن نفسه يتحمل مسئوليته في هذا الظرف الصعب مش هيبقى فيه نتيجة جيدة”.
وقال إنه “حتى في حالة حظر التجول لازم المواطن يتحمل مسئوليته… حظر التجول جزئي ولا كامل ؟ ده هيكون على حسب التقدير”.
“مفيش رقم بنخبيه وبنعلن من أول يوم والأرقام متوافقة 100% مع أرقام منظمة الصحة العالمية معندناش حاجة نخبيها علشان إحنا في الموضوع ده مش من مصلحتنا إننا نخبي”.
وأضاف: “دور الحكومة هو التوعية وبالتالي الإنسان مسؤول نفسه ومسؤول عن أسرته وبالتالي لازم ندخل معانا الناس والإجراءات اللي بتتخذ إجراءات تصاعدية، ولما دخلنا في المرحلة التانية من انتشار كورونا اتخذت إجراءات وقف المدارس وقفل المحال التجارية ووقف الطيران”.
وتابع: “وجدنا أنه من الأفضل مانعملش كل هذه الإجراءات في وقت واحد فعملناها بشكل تصاعدي، وكل فترة بنعلن حاجة”.
وأكد على أهمية التدرج في مواجهة الفيروس قائلا: “لو قولنا كل الإجرءات دي في يوم واحد بمعرفتنا للشعب المصري كان لازم يبقى فيه تدرج علشان يبقى فيه شحن مستمر”.
وأضاف: “عدم زيادة الحالات بشكل كبير ساعد في هذا وإن كان بندعو ربنا إننا مانوصلش للسيناريو الثالث وساعدونا في ده، لأن الأرقام النهاردة عدت الـ300 وخايفين نصل إلى رقم 1000 وصعوبة تتبع المخالطين للحالات المكتشفة”.
وأعلنت مساء الاثنين أنه تم تسجيل 39 حالة جديدة ثبتت إيجابية تحاليلها معمليًا للفيروس، جميعهم من المصريين المخالطين للحالات الإيجابية التي تم اكتشافها والإعلان عنها مسبقًا، وذلك ضمن إجراءات الترصد والتقصي التي تُجريها الوزارة وفقًا لإرشادات منظمة الصحة العالمية، لافتا إلى وفاة 5 حالات من ضمنهم حالة لهندى، و4 حالات من المصريين.