أكدت الدكتورة هالة زايد وزيرة الصحة أن مصر مستعدة لكل الاحتمالات لمواجهة فيروس كورونا الذي لا تستطيع دولة أن تنفي إنه لن يأتي إليها.
وزيرة الصحة : “مدى الاستعداد هو اللي يفرق دولة عن دولة والدول العظمى بها إصابات
وقالت في مداخلة هاتفية لها مع برنامج الحكاية على قناة إم بي سي مصر : “فيروس كورونا غالبا جاي، طب لو جه 82% مننا مش هيحتاج مستشفى أصلا ولا هيحتاج لعلاج، وهيخف لوحده، و15% مننا هيحتاج مستشفى، واحنا كدولة مستعدين، الفيروس جاي جاي، ولازم نفتكر أنه مش فيروس قاتل”.
وأضاف: “رئيس منظمة الصحة العالمية قال النهاردة إن من عدم الحكمة ويبقى خطأ قاتل إن أي دولة تظن إن مش هيجيلها كورونا احتمال كبير يجيلنا كورونا؛. لكن احنا مستعدين بـ 3 سيناريوهات مراجعين من منظمة الصحة العالمية لغاية أسوأ سيناريو ممكن حد يتخيله”.
وأكدت أنه “تم مراجعة دور كل الوزارات في الـ 3 سيناريوهات، قوة النظام الصحي عندنا في قدرته على المواجهة، مفيش حاجة يمكن منعها نهائي، لا يمكن وخلينا نرجع إلى 2009 لما كان فيه ما يسمى انفلونزا الخنازير”.
وقالت وزيرة الصحة، إن انفلونزا الخنازير: “في خلال شهرين تلاتة هجم على العالم وأصاب 780 مليون في العالم..ومات بسببه 265 ألفا وأصاب 213 دولة يعني أصابت العالم بنسبة 100%”.
وأكدت أن “مدى الاستعداد هو اللي يفرق دولة عن دولة”، متسائلة: “هل الكورونا مش جاية ؟ هرجع لكلمة رئيس منظمة الصحة العالمية إنه يبقى خطأ قاتل لو فيه دولة تفتكر إن كورونا مش هتجيلها”.
وتابعت: “كورونا أصابت، أصابت الدول المتقدمة اقتصاديا، والمفاجأة إن الدول قليلة الدخل هي اللي ما أصابهاش كورونا .. قصدي إن مفيش ارتباط بين قوة النظام الصحي وتجنب فيروس كورونا .. ولكن المهم هو مدى الاستعداد .. علشان كدة كل حالات الاشتباه اللي بتجيلنا بنحللها وبندي التحاليل لمنظمة الصحة العالمية حسب اللوائح العالمية .. ولو الدولة قررت عدم الإعلان عن وجود أي إصابة منظمة الصحة العالمية هتعلن خلال 48 ساعة… كل التحاليل منظمة الصحة العالمية تذهب للمنظمة بالعينة وبيانات المرضى.”
وقالت وزيرة الصحة: “إحنا جاهزين في كل محافظة بكل السيناريوهات ودور وزارة وزارة ودور هيئة هيئة ودور المستشفيات وكل ده متحدد واحنا في ورش عمل مستمرة في المحافظات، كل ده متحدد ومتراجع علشان نوحد الكلام ونتاكد ان احنا كلنا فاهمين الكلام صح”.