قال الرئيس عبد الفتاح السيسي رئيس الجمهورية، ان الاقتصاد هو كلمة بقول عليها "مصروف الدولة المصرية".. مضيفًا: ان الدين الخارجي بدأ في مصر سنة 1970، وقبل ذلك لم يكن هناك دين على مصر.. المصروف بتاعها كان بيتصرف عليها.
اضاف السيسي خلال كلمته في اكاديمية الشرطة اليوم، انه بعد حرب 1967 اضطرت مصر انها تستلف عشان تصرف.. ومن عام 1970 لحد النهاردة حصل كلام كتير.. عشان الدولة تقدر تكمل.. ومحدش غلطان.. بس هو في النهاية مصروف.
تابع: ان السلف قطعا مش كويس وكلنا حافظين امثلة كتيرة ان السلف ده مش كويس .. لكن السلف بسبب ان المصروف الموجود مش كفاية .. الدين اللي احنا بنتكلم عليه هو عبارة عن الفرق بين المصروف المتاح و المصروف المطلوب.
واستكمل قوله: انه من الممكن التخلص من الدين الخارجي بس عايزة حاجات كتيرة على رأسها فهمنا كلنا ان تقدم الدول محتاج ارادة جماعية ووعي مجتمعي كبير بمتطلبات ذلك.. عشان لما اجي اقول هشيل من الوقود دعم معين متقولش انت غليت عليا ليه.
وقال السيسي: ده غصب عني عشان مش عايز الدين يزيد عليا.. انا بستلف المبلغ زائد الفائدة بتاعتهم.
اضاف السيسي: أن معدل استهلاك مصر من انابيب البوتاجاز من 250 إلي 300 مليون انبوبة سنويا ودعم البوتاجاز فقط 30 مليار جنيه.. ولما اوزع جنيه واحد على مليون واحد .. الدولة بتدفع مليون جنيه.
تابع السيسي ان فاتورة الدعم تتمثل في الوقود والخبز والسلع التموينية واسعار الكهرباء وبعض الخدمات الاخري باجمالي 600 مليار جنيه.. وممكن الدولة تدفع المبلغ ده كله .. بس لو المصروف اللي معاك يقضي احتياجاتك.. ومن ضمن الاحتياجات الـ600 مليار جنيه وكانوا قبل كده اكتر من كده بكتير.
وقال السيسي: انا قلت لازم احل فقر مصر وهو دواء صعب ومر.. لكن لو عايزين نتجاوز مرحلة الفقر والديون مش هيكون الا اننا نقاسي ونقسي على نفسنا.
اضاف السيسي: الحل اننا نفضل نقول كده ونقوم نهدها ونبنيها بعد كده !؟ اذا كان هي مكانتش قادرة تمشي من غير هد .. لو اتهدت مش هتقوم تاني لا في اي جيل ولو بعد 100 سنة.
وقال السيسي: عشان تبقي عندك موازنة كويسة وتصرف منها كويس محتاج 50 تريليون جنيه في السنة ومتستلفهومش ولو استلفت يبقي بتخربها.
