كعادتي أبدأ يومي بقراءة الصحف وأنا أشرب فنجاناً من الشاي بعدها أفتح بريدي الإلكتروني علي عجل حتي أتفرغ لتنفيذ البرنامج اليومي الذي أحدده لنفسي في اليوم السابق.. إلا أن يوم الاربعاء الماضي ليس كأي يوم آخر فنحن مطالبون كفريق عمل بقسم التأمين والبنوك بأن ننجز جميع المهام الخاصة بملحق صناديق التأمين الخاصة لنتفرغ لصفحة التأمين الاسبوعية،ومع ذلك لم استطع ان أغير برنامجي وفتحت البريد الالكتروني علي الرغم من يقيني بأنه لن يأتي بجديد، فبريد الامس هو بريد اليوم.
 
ولكن خاب ظني فقد حمل لي البوسطجي الالكتروني »الايميل« رسالة لم ولن اتوقعها نظرا لان الذي ارسلها شخص قل أو مؤسسة قل ايضا ولكنه في الحالتين راسل مهم جدا أو كما يطلقون عليها بالافرنجية »VIB «.
 
وبعيدا عن الثرثرة التي لا أحبذها فقد كان الراسل الحزب الحاكم نفسه.. فتحتها علي عجل(بفتح العين) متوقعا ان مسئولا كبيرا من الحزب ضمن الذين يمنحون ويمنعون امثال احمد عز سيخبرني بأن المجمع الانتخابي استقر علي ترشيحي بدائرة حلوان بعد ان اقصي مصطفي بكري منها.. خاصة ان الرسالة عنونت بـ»من اجلك أنتتتتتتتتتتتت«، تساءلت في نفسي من المقصود بـ»أنتتتت « هل انا؟ لتكرر الرسالة نفس الكلمة نعم انت.. احنا عايشين معاك في كل قرية وكل مدينة عارفين مشاكلك واحلامك.. همومك هي همومنا واولوياتك هي اولوياتنا، معاك ومن اجلك بدأنا عملية تغيير كبيرة في مصر… الخ كلاااااااااااااااام كتير معسول التوقيع.. مرشحو الحزب الوطني الديمقراطي لمجلس الشوري.
 
 طيب انتم عرفتم همومي منين، بصراحة شككت في صديقي محمد وقلت في قرارة نفسي انه هو اللي قالهم علي همومي.. بس محمد اقسم بأيمانات المسلمين انه استحالة يبيع صاحبه.. طيب احلامي مين قالكم عليها ده مفيش حد يعرف احلامي.. سألت الموقعين علي الرسالة المعنونة بـ»أنتتتتتتتتتت« فاجابوا، اصبر هي إيه مشاكلك في الأول؟ الشغل! والله العظيم لو حلفتلنا علي الانجيل أو المصحف انك هتنتخبنا مش مهم تقتنع بس احلف، هنوفرلك فرص عمل وهنكافح البطالة.. وكمان يا سيدي هنحسنلك دخلك ونوفر ليك الحماية ولكل الاسر المحتاجة، مش بس كده دا إحنا هنطور الخدمات العامة ومستوي الحياة للمواطن وكمان يا عم هنعزز الديمقراطية والمشاركة الشعبية وعارف ايه كمان هنحافظ علي مصر قوية وآمنة عرفت بقي لو حلفت علي المصحف أو الانجيل انك هتنتخبنا احنا هنعملك ايه.
 
طيب حد يقولي ارد اقولهم ايه!! ماشي هاحلف بس قبل ما احلف عايزكم تردوا عليا انتم بتقولوا ايجاد فرص عمل جديدة طيب منين والمصانع والشركات بتهيكل العمالة من ساعة الله يخرب بيتها الازمة المالية ما حصلت.. طبعا بتوع الحزب جاهزين هما هيغلبوا في الحتة دي.. بص يا سيدي احنا هنستكمل برنامج استصلاح مليون فدان في الصحراء علشان نوفر 70 الف فرصة عمل جديدة سنويا قلتلهم تستصلحوا مليون فدان؟ طيب هتجيبوا مية منين؟مش هيمنعوا عننا المية الناس الوحشة اللي ماشيين ورا اسرائيل ولا انتوا تقصدوا ارض توشكي.. قاطعني الموقعون علي رسالة من اجلك »أنتتتتتت«.. »سيبك من النقطة دي هنتفاهم فيها بعدين بس لما تحلف انك هتنتخبنا«.
 
ماشي، طيب تحسين الدخول ازاي وتوفير الحماية للاسر انتوا مش هتكونوا اعضاء في مجلس الشوري اللي جنب مجلس الشعب يعني هتشوفوا الناس اللي بالعشرات كل يوم نايمين يا ولداه من غير حد ما يسأل فيهم.. قاطعني احدهم عيب عليك الناس دول مش من مصر احنا جاينلك »أنتتتتتتتتتتتتتتتت«، ماشي هنعديها!! طيب ممكن تقولولي تعزيز الديمقراطية بأمارة إيه؟ بأمارة الأحزاب اللي دمرتوها ولا بأمارة العيال الوحشين بتوع 6 أبريل اللي كان ابن عمكم بتاع مجلس الشعب (بكسر الشين) عايز يضربهم بالرصاص ولا بأمارة إلغاء الإشراف القضائي علي الانتخابات.. لالالا كله الا كده، دي الجملة اللي رد بيها واحد من الموقعين علي رسالة من اجلك »أنتتتتتتتتت« واستكمل يا عم انت مش فاهمنا ليه إشراف قضائي إيه اللي انت عايزه، إحنا اخوات يعني هنضحك عليك طيب انت مش فاكر عادل ابو الحج فهمي اللي مات من عشر سنين ولسه اسمه في كشوف الانتخابات يعني احنا مش هنزور حاجة ومش فاكر كمان علي ابو حسن اللي كان مسافر بلاد بره وبقدرة قادر انتخب اخونا بتاع الحزب في الدورة اللي فاتت عرفت بقي ان مفيش لزمة للاشراف القضائي وإن احنا ذمتنا زي ذمة الجزارين.
 
وفجأة طلعوا كلهم بصوت واحد.. بنقولك ايه هتحلف انك تنتخبنا ولا لعععععععععع قلتلهم طيب آخر سؤال والنبي؟ قالولي آخر سؤال، قلتلهم طيب انتوا بتقولوا اننا هنحافظ علي مصر قوية وآمنة طيب بأمارة إيه بأمارة المية اللي هتتقطع عننا ولا بأمارة دور مصر اللي بيتراجع ولا بأمارة الغرامة اللي فرضها علينا الاتحاد بتاع الكورة اللي اسمه »الفيفا« بعد بتوع الجزائر ما ضربونا في أم درمان ولا؟؟؟؟؟؟؟؟؟؟؟؟ قالي واحد منهم انت اسمك ايه؟ قلتله اسمي ماهرأبوالفضل، قالي انت تبع حزب ايه؟ قلتله انا مش مشترك في اي حزب وياريتني ما كنت اتسحبت من لساني وقلتلهم كده، ولاد الإيه قالولي انت مين أصلا علشان تسألنا كل الاسئلة دي؟ قلتلهم انتوا مش بتقولوا من اجلك »أنتتتتتتتتت« قالولي لالالالالا أنتتتتتتت يعني حبيابنا الُهٌبل اللي بنضحك عليهم، وهييييييييييييييييييييييييييييييييه!!!!!!!!

ماهر أبو الفضل

[email protected]