هاجم المخرج محمد دياب، ما انتهت إليه أزمة لاعب المنتخب المصري الأول لكرة القدم، عمرو وردة، بعودته مرة أخرى إلى صفوف الفريق لاستكمال منافسات بطولة أفريقيا، بدءا من دور الـ 16,
المخرج كتب عبر صفحته الشخصية بموقع التواصل الاجتماعي “فيس بوك”، ما يشير إلى رفضه قرار اتحاد الكرة المصري بعدم استبعاد وردة من صفوف الفريق.
وقال في تدوينة مطولة: «الناس الكتير اللي محبطه من اللي حصل في موضوع وردة، لسه عندنا كتير نقدر نعمله.. من أول مقاطعة المنتخب، لغاية إننا نروح الاستاد ونشجع ضدهم (ورده واللي أيدوه)..».
وأضاف، «لو في مصر وردة يقدر يهرب من العقاب فاليونان اللي بيلعب فيها وإنجلترا -اللي بيلعب فيها اللاعيبه اللي أيدوه- بلاد مبتتسامحش في التحرش.. في أوروبا القصة بتفاصيلها الواضحة لما تتعرف بقوة السوشيال ميديا، ميه في الميه هتأثر في كاريرهم وهتشوفوا وردة فريقه بيسرحه».
وتابع: «كل البنات عاهرات زيك.. دي جمله من كلام وردة في الشات تفهمك بيفكر ازاي.. من خبرتي المتواضعة في موضوع التحرش عشان الفيلم إلى عملته وقضيت فيه ٣ سنين بحاول افهم المتحرش بيفكر ازاي، فوردة متحرش محتاج علاج نفسي وإعاده تأهيل بس بسبب ان الموضوع اتحل بسهولة فهو مش هيسعي للعلاج ومؤكد هيرجع يعمل مصيبه، حتى لو اتجوز فممكن يضرب مراته مثلاً.. يعني اللي ساعدوا وردة يطلع من الموضوع بدون عقاب حقيقي ووقفة مع النفس في الحقيقة بيأذوه» .
واختتم: «شخصياً قررت إن الموضوع ده هيبقي ٦٧٨ الجزء التاني، عشان لما صلاح والمحمدي يلاقوا اسمهم في كل مهرجانات العالم وجرايد العالم الفنيه مربوط بأنهم أيدوا متحرش يبقوا يعرفوا إن الله حق، وكل شخص مشهور هيفكر يشاركنا أفكاره الرجعية المدمرة يفكر ألف مرة».
كان أحمد شوبير، نائب رئيس اتحاد الكرة، قد أعلن عودة عمرو وردة، لاعب المنتخب الوطني للانتظام في معسكر الفراعنة الجاري بعد قبول اعتذاره عن مقطع الفيديو الفاضح المنتشر له في الساعات الأخيرة.
وأوضح شوبير عبر صفحته الرسمية بموقع التواصل الاجتماعي “فيس بوك” أن اتحاد الكرة قد قرر قبول اعتذار اللاعب عما بدر منه.
يشار إلى أن هاني أبو ريدة، رئيس الاتحاد المصري والمشرف العام على المنتخب الوطني، كان قد قرر استبعاد اللاعب عمرو وردة من معسكر الفريق بعد انتشار مقطع فيديو فاضح يخصه خلال الساعات الأخيرة.