جدد الرئيس عبد الفتاح السيسي تحذيره من خطورة مخالفات البناء والبناء العشوائي على مستوى الجمهورية، مشددًا على أنه لن يسمح باستمرار تلك الظاهرة، ومؤكدًا أن إدارة المساحة العسكرية لديها الإمكانات التكنولوجية والمنظومة التي تمكّنها من رصد كل عمليات البناء على مدار الساعة.
وخلال افتتاح عدد من المشروعات القومية بمحافظة الإسكندرية، اليوم، توقّف الرئيس السيسي أمام إحدى حالات التعدي على الأراضي الزراعية بإحدى القرى، تبرز انتشارًا مفاجئًا لمبان عشوائية على أرض كانت زراعية.
وقال الرئيس السيسي: ده كان شكل الأرض.. لن أسمح أبدًا نهدّ بلدنا ونضيعها كده.. لو لزم هخلي الجيش المصري ينزل كل قرى مصر.. يا نقف ونبقى دولة مظبوط يا أسيب مكاني وأمشي.. ويجي أي حد يتولى البلد دي ويضيعها ويخربها.
وتابع الرئيس السيسي: الموضوع ده لن أسمح بيه.. أنا جبت معدات هندسية تكفي إني أشيل وأبيد كل المخالفات.. لو الناس مش عاجبها الكلام ده تستفتى على إننا نسيب مكاننا ونمشي.. أنا بتألم وبتعذب كل يوم إزاي لما بشوف بلدنا بيتعمل فيها كده.. ده عدو. طب إنت عايز تبني؟ خليني أخططلك وأبنيلك أنا حتى لو على أرض زراعية.. وبقول للسادة المحافظين والسادة مديري الأمن اللي موجودين.. يقولي بصراحة إنه مش قد الموضوع ده ويمشي.. يقول بصراحة إن الموضوع أكبر منه وأنا هحترم رغبته. أكد الرئيس أنه ليس ضد البناء حتى لو على أرض زراعية، لكن أي تخطيط للبناء يجب أن يتم عن طريق الدولة التي ستتحمل توصيل المرافق من كهرباء ومياه وصرف صحي وطرق.
وأضاف الرئيس: مفيش حد في العالم يتحدث عن أوضاعه قدام الرأي العام على الهوا كده إلا لو كان الهدف عنده هو الإصلاح بس مش حاجة تانية.. المحافظ ومدير الأمن اللي لا يستطيع أن يقف أمام هذا الموضوع يقولي أنا ماقدرش.
وشدد الرئيس على أن ملف مخالفات البناء تكليف واختبار وتحدّ للحكومة، مشيرًا إلى أن من لا يستطيع التصدي لمشاكل بلده من المسئولين، عليه أن يترك موقعه.
وقال الرئيس السيسي: والله العظيم وأنا جاي بالطيارة لازال لغاية دلوقتي وأنا بتكلم فيه ناس بتتعدى وبتبني… بتعملوا كده ليه؟.. اوعوا تفتكروا إن إدارة المساحة ورئيسها جاي من غير ترتيب.. أنا قايل إنه هاتوا مثال بدون ذكر القرية.. المسئولين عن الدولة يا إما رجال مظبوطين يتصدوا لقضايا بلدهم مظبوط.. لحاجة تانية.. مش وقتها.
وأضاف: بقول تاني.. كفاية كده.. خلّونا نصلح اللي إحنا فيه ده ونحافظ على المتاح عندنا.. ده خراب لدولة والله العظيم.. الأمر لله ثم لينا كلنا وأنا لا يمكن أبدًا هسمح بده.. ودي رابع مرة أقولها وأنا اتكلمت في الكلام ده من 3 سنين وشوية.