تقدم الإعلامي تامر أمين المذيع بقناة النهار، باعتذار لأهل الصعيد، في فيديو نشره عبر صفحة قناة النهار على موقع التواصل الأجتماعي«فيسبوك»، عما قاله في برنامجه آخر النهار.
وقال في بداية حديثه: السلام عليكم ورحمة الله وبركاته، أنا حابب أبدأ الفيديو.. أولًا وقبل أي كلام في التفاصيل باعتذار واضح وصريح لا لبس فيه لكل أهالينا في الصعيد وفي كل مكان في مصر زعلانين مني.. أنا لا هكابر ولا أقاوح.. أنا من الناس اللى بتعتذر لما بتحس إن الناس زعلانة منها، حتى والله لو كانت نيتي يعلم ربنا نيتي خير والهدف المصلحة العامة.. أنا أكتر حاجة تضايقني في الدنيا إن واحد صعيدي بس أو واحدة صعيدية بس يزعلوا مني.
وتابع: أنا من أكثر المؤمنين بالصعيد واحترام الصعيد وعزة نفس الصعيد وكرامة الصعيد وأصل الصعيد.. هما صعيد مصر هما أصل مصر اللى طلّعلنا كل القامات والأدباء والمفكرين والناس الشريفة المحترمة.. والله مقصدش الإهانة أبدًا دي آخر حاجة تيجي على دماغي وآخر حاجة في الدنيا ما حابب واحد صعيد يكون زعلان مني.. وأنا بقول لكل صعيدي وصعيدية جزمتكم على راسي من فوق.
وأضاف: أنا ابنكم.. وأنا ابن ريف مصر.. ونسايبي أساسًا من الصعيد.. مرات أخويا من الصعيد وبتشرف بيها وبتشرف بالنسب ده.. فأرجوكم متزعلوش مني.. وحتى لو كان قصدي خير.. بس لو واحد فيكم بس زعلان أنا بقوله حقك عليا وأنا آسف باعتذار صريح.
واختتم حديثه قائلًا: هذا الاعتذار سينشر في كل حتة لأنني اتشرف بأهلنا في الصعيد ومتزعلوش مني وأنا أخوكم وأنتم أهل الصفح وأهل العفو وأهل الكرم.. تحياتي لكم جميعًا في صعيد مصر المحترم والشريف.. تامر أمين.
يذكر أنه صباح اليوم الجمعة، قررت هيئة مكتب المجلس الأعلى لتنظيم الإعلام، وقف برنامج الإعلامي تامر أمين إلى حين استدعائه والتحقيق معه يوم الأحد القادم.