كشف وزير النقل كامل الوزير في مداخلة مع برنامج على مسئوليتي على قناة صدى البلد، أن إشغالات بعض القطارات بلغت الخميس الماضي 110%، مشيرا إلى وجود إجراءات تطهير وتعقيم مستمرة بالقطارات والمترو.
وقال: “بدأنا نركب أجهزة تعقيم ومطهرات في محطات المترو وكل واحد يقدر يدخل يعقم إيديه ويطهر نفسه وبنوزع الكمامات”.
وأضاف: “القطارات نفس الكلام كنا نزلنا إلى 300 ألف راكب، ويوم الخميس الماضي دخلنا في 600 و 700 ألف راكب”.
وأشار إلى استمرار التزاحم في عدد من خطوط القطارات قائلا: “فيه زحمة في خطوط الضواحي زي منوف وطنطا والمنصورة وشبين القناطر والمناشي”.
وأضاف: “هذه الخطوط لايزال عليها زحمة غير طبعا خطوط القطارات المكيفية اللي بتطلع في اتجاه اسكندرية والصعيد ، ويوم الخميس بالتحديد نتيجة سفر أهالينا للصعيد والأقاليم كان عندنا نسبة إشغال 110% في بعض القطارات مش كل القطارات”.
وتابع: “لما بنلاقي زحام بنطلع قطار تاني في نص ساعة وبنعلن وبنقول يا أهالينا ياللي رايحين المناشي او الزقازيق هنطلع قطار تاني علشان نقلل الكثافة وان شاء الله تفضل كدة آمنة”.
وعبر وزير النقل عن امتنانه لعدم وجود إصابات بفيروس كورونا تم رصدها، قائلا: “مش عايزين نحسد الحمد لله نمسك الخشب لم تحدث حالة كورونا واحدة في القطارات والمترو، وآه فيه زحام في بعض الأيام وفي قطارات الضواحي ولكن الحمد لله مع التطهير والتعقيم الحمد لله ربنا ساترها معانا”.
وحول خطة العيد، أكد وجود خطة كاملة ستعلن قبل نهاية رمضان بـ 15 يوما.
وقال وزير النقل : “في العيد بيحصل زحام ضروري في اتجاه الصعيد وان شاء الله السنة دي عاملين حسابنا وجالنا 30 جرار جديد وهيجيلنا 20 جرار جديد قريبا وبنطور عربات الركاب حاليا وهنزود القطارات على طريق الصعيد أو على سكك حديد الصعيد علشان نواجه الزحام المتوقع”.
وأضاف: “كل سنة بيحصل كدة في الأعياد والمواسم وإحنا متوقعين إن شاء الله ومتحسبين ليها وهنبقى متواجدين في المحطات إن شاء الله”.