قال الرئيس عبد الفتاح السيسي، رئيس الجمهورية، ردا على كلمة وزير المالية د. محمد معيط في مؤتمر حكاية وطن المنعقد اليوم، إنه سيتوقف أمام إيرادات ونفقات الدولة دايما كنت أقول هو احنا ليه كده؟
وأضاف السيسي: لما هي دولة من سنة 1980 لغاية دلوقتي دايما عندها مشكلة في الإيراد والمصروف، أنا بقول للمواطن ببساطة دخلي اللي هو دخل مصر، وإيرادنا مش قد مصروف مصر.. من امتى؟.
وتابع السيسي: مصر لم تستدين ولم يكن عليها ديون حتى عام 1970 لكن تداعيات الحرب فرضت على مصر لتجاوز آثار الحرب عام 1973 فرضت على الدولة أنها تجيب موارد من خلال الديون.
واستكمله قوله: ده مهم نعرفه كمصريين لأنها بلدنا.. القلة والعوز مش مشكلة المشكلة إنك تقبله المشكلة إنك ماتبقاش مستعد تقاتل من أجل إنهائه واللي قبلنا حاولوا.. الناس اللي كانوا موجودين قبلنا من سنة 1980 بيحبوا بلدهم ومتعلمين وفاهمين.
وقال السيسي: كتير من الناس يقولوا أن الرئيس السادات عمل سلم وكده.. كان فيه تحديات كبيرة بتواجه الدولة بعد حرب والبلد بتنموا والناس بتزيد عادي.. ده كان حال الدولة إيرادنا ده وإنفاقنا ده طب نعمله ازاي؟
وأضاف السيسي: لو احنا نمونا ثابت.. انت بتتكلم في 20-25 مليون مواطن زادوا منذ عام 2011، ده احنا أساسا لم يحدث أن الإيرادات والنفقات قربت من بعض.. كل أزمة هتعملها أو هتتعمل فيك هيبقى ليها تبعات.
وقال السيسي: اوعى تفتكر أن الـ450 مليار دولار اللي خسرناهم بعد 2011 لحد 2013 حد اداهملنا.. لا دي دولة بتدفعهم من لحم الحي.. هنعمل ده ازاي إذا ماكناش نعرف ايه الحكاية؟ حكاية ليه بلدنا كدة بقالها 43 سنة.
وأضاف السيسي: أنا بقعد مع ناس متعلمة متخصصة موجودين معانا في المسؤولية.. جينا وقت كورونا قولنا هناك 5 مليون عمالة في المشروعات عليها أن تستمر.. انفقنا نحو 600 مليار جنيه لمواجهة تداعيات كورونا.. جبناهم منين؟