قال الرئيس السيسي، “يهمني إننا كدولة رتبنا نفسنا واستعدينا من خلال العلم والمعايير الدولية.. دي دولة بتجابه خطر جسيم .. الدولة بكل عناصرها لو ماتعملناش بجدية وحسم مع الموضوع هنخسر كتير”.
وأضاف الرئيس في كلمة له منذ قليل عن مواجهة الدولة لانتشار فيروس كورونا، “قدام مني الإجراءات اللي عملتها مصر من أول الموضوع .. كان فيه فعل في مواجهة أفعال وإجراءات وأحداث بتمسنا”.
وتابع، “بقول احنا كمصريين نكون مسئولين ومزيد من التوعية والاشتباك مع الأحداث والمزيد من نشر الإرشادات لتشكيل الوعي لدى المصريين أنا شايف التعبئة كبيرة أوي واحنا ماخبيناش عليكو حاجة.. خلال مسيرة الـ ٦ سنين اللي فاتت كان التشكيك دايما موجود والحديث الكاذب اللي فيه افتراء كثير.. دي حالة هتعيشها مصر لتشكيل حالة من عدم الثقة لدى المصريين”.
وقال الرئيس السيسي، “طب احنا هنخبي عليكو ليه يا مصريين؟ .. الأمر ده في الدنيا كلها وآثاره هائلة على الدنيا كلها.. إذا كان ربنا لطفا منه حتى الآن بينا وإجراءات احترازية حقيقية قامت بيها الدولة تحول دون انتشار مؤذي لينا”.
وأضاف، “اتعاملنا مع الموضوع من الأول وكالعادة .. والأرقام اللي بتطلع موجودة عندنا.. انتوا مستكترين إن ربنا حامي مصر ؟ بالأخذ بالأسباب.. فيه كلام كتير بيتقال في مواقع التواصل .. زي ما بنقول ربنا لطفا منه حتى الآن ومن خلال إجراءات غير مسبوقة بصراحة “.
وتابع، “لما حصل إصابة في مركب الأقصر تم إجراءات عزل وتعقيم وتطهير جميع المراكب، احنا خدنا إجراءات بسيطة خالص.. تعطيل مدارس وتخفيض تواجد الموظفين وغلق المحال.. بنقلل حجم الاختلاط بشكل أو بأخر.. احنا ١٠٠ مليون”.