قال الرئيس عبد الفتاح السيسي، إن الدولة المصرية تحتاج 70 تريليون جنيه، وليس 7 تريليونات جنيه تم صرفها حتى الآن في مشروعات قومية تشمل حياة كريمة، والمشروعات التي تم تنفيذها نصفها تم عمله في حياة كريمة.
وأضاف السيسي خلال افتتاح عدد من المشروعات في محافظات سوهاج: “اللي بنعمله في سوهاج طيب في كام محافظة واللي ناقص قد إيه، طيب واللي اتعمل تشغيله بكام، لو عملت مكتب بريد أو مدرسة أو مستشفى تشغلهم بكام وتحافظ عليهم بكام، كل يوم وكل شهر وكل سنة”.
وتابع السيسي: لو أنتم ماخدتوش بالكم يا شباب مصر، اللي بنقوله محاولة الوصول للأرقام الطبيعية بالنسبة للمعدلات العلمية اللي بتقول نعمل كام مدرسة لكل كام طالب، أنت ماشي في سبق، لأن عندي أولا نقص في الفصول، وعدد الفصول ده بيقابله تقديم خدمة تعليمية لأولادنا والعدد ده أقل من المطلوب بمنتهى البساطة كده.
واستكمل: أنت الأول عايز تسد الفجوة بين اللي موجود واللي مفروض يكون موجود ثم كل سنة تعمل الحجم المطلوب للقادم، لو بيدخل في التعليم النهاردة 2 مليون أو مليون شخص يبقى عايز تزود كام فصل 60 ألف ده بفرضية إن إحنا قفلنا الفجوة الحالية.
وأضاف: طيب الفصل بكام، لو عايز أعمل 60 ألف فصل عايز على الأقل 60 مليار جنيه ثم أحط معاهم المدرس والطقم الإداري بكام ومنين، طيب بأقول الكلام ده ليكم ليه، لما ألاقي حلم عند الشباب وممكن يتعمل منه حاجة مقولش ربنا يوفقه، يمكن يجيبلي حاجة، وحاجة جنب حاجة جنب حاجة البلد دي موقفها يتغير.
وتابع السيسي: أنا أعرف كويس يعني إيه قرش، وأعرف يعني إيه دولة، ولازم نكون فاهمين إن لو إحنا مستمرين بالطريقة دي كل الجهد اللي هيتعمل مش كفاية.
وأكد السيسي دعمه للنماذج الشابة التي تحدثت خلال المؤتمر الصحفي والمشروعات التي يقومون بالعمل عليها، قائلا: الدعم موجود وانا قدامي 6 نماذج تقريبا من الشباب الذين تحدثوا، وبتكلم بالنظريات ان 50% منهم ممكن تجيب نتيجة واكيد الـ100% من النماذج دي تجيب نتيجة.
وقال السيسي، نجري على حلمنا ونصدق إن ممكن يحصل فيه نجاح كمشروع، وأنا بقول الأرقام اللي أنتم محتاجينها هتتوفر مش من جيب الحكومة لأن عندي ترتيبات تانية، لأن الحكومة مطحونة جدا.
وأضاف السيسي: بقول لكل المصريين ان الـ7 تريليونات رقم متواضع جدا مقارنة بالحلم، لسه بدري أوي أوي أوي لسه بدري وده مش معناه ان الصعيد كان مهمش وبيتنسي، لأ البلد مكانتش قادرة.
وتابع السيسي: لازم نحترم عقول بعض، ونبقي موضوعيين وصادقيين في تقييمنا ونعرف ليه واقعنا كده لأن البلد مش قادرة ومكانتش قادرة، واللي بيتعمل ده قبل كل شئ هو توفيق من ربنا.
وقال الرئيس عبد الفتاح السيسي: أنا بتابع السوشيال ميديا وكل تعليقات الناس وما يتم توجيهه من تعليقات للحكومة.