قال الرئيس عبد الفتاح السيسي رئيس الجمهورية إن الأمم لا تصمد بقيادتها فقط بل تصمد بشعبها وقيادتها ومهم ناخد بالنا من التحديات الموجودة في منطقتنا وأرجو منكم جميعا متابعة الأوضاع الموجودة على حدودنا الغربية وحدودنا الجنوبية وحدودنا الشرقية الآن هتجدوا دايما إنها لحكمة لا نعلمها مشتعلة.
وأضاف السيسي خلال كلمته منذ قليل في حفل تخريج دفعة جديدة من طلاب الأكاديمية والكليات العسكرية 2023، أنا عايز أقول للمصريين البسطاء لما يكون ليك جار عنده مشكلة صغيرة أنت بتتأثر بيها تصور بقا لو الجار ده البيت بتاعه مشتعل، فالبيوت حوالين مننا مشتعلة كلها ويشاء الله أن تكون مصر آمنة مطمئنة.
وتابع: يمكن تكون في صعوبات وتحديات موجودة لكن الأمر المهم إن إحنا نفضل ثابتين وصامدين ومش بس كده، وآملين ومتفائلين بالله، عايز أقولكم مصر بتدير سياستها بشكل يهدف في الأول والآخر إلي السلام والتنمية والبناء والتعاون دي سياستنا مش بس حتي في الفترة اللي تولينا فيها المسئولية لا من قبل كده.
واستكمل قوله: كنا حرصين ألا نتطلع أبدا خارج حدودنا، حدودنا الموجودة منذ آلاف السنين هي الحدود القائمة ولم يكن لمصر أبدا تجاوز هذه الحدود أو الطمع في حدود أو قدرات آخرين كنا دايما راضيين باللي ربنا يعني أعطاه لنا وبنعمل بيه.. المرحلة الموجودين فيها مرحلة صعبة جدا وأنا مش عايز أقول كلام كتير .. أكيد أنتم متابعين كل شيء.
وقال السيسي: إحنا بنبذل جهدا كبيرا جدا لاحتواء التصعيد الموجود والاقتتال ونحاول نصل إلي وقف الاقتتال وأيضا التخفيف عن الشعب الفلسطيني في قطاع غزة واتصالاتنا لا تنتهي.. إحنا بنكلم الجميع القادة والمسئولين وهما كمان بيكلمونا والكل مهتم وإحنا حريصين على أن تصل المساعدات سواء كانت طبية أو انسانية في الوقت الصعب ده للقطاع.
وأضاف: أنا بقول الكلام ده للناس عشان في الفترة دي بيتردد كلام كتير وفي شائعات وأنا حبيت أقولكم إننا مش ساكتين وبنتحرك مع أشقائنا وأصدقائنا في الدول العربية وحلفائنا، ونحن متعاطفين ولكن خلي بالكم عايزين وإحنا بنتعاطف نكون دايما بنتعامل برضه بعقولنا.. عشان نصل إلي السلام والأمن بشكل لا يكلفنا الكثير، ده مش معناه إن إحنا مش عايزين نتكلف لا بنقول مستعدين نتكلف في إطار قدراتنا وإمكانياتنا.
وأكد السيسي: إحنا لم نسبب مشكلة لأحد بل بالعكس إحنا بنتكلم وعندنا 9 ملايين من الضيوف من دول كتيرة أوي جاؤوا إلي مصر عشان الأمن والأمان.. لكن بالنسبة للقطاع أنا بقول الخطورة هناك خطورة كبيرة أوي لأنه يعني تصفية القضية دي، فمهم أوي إننا نكون منتبهين لده، والأمر هناك مختلف القضية دي قضية العرب كلها ومهم لشعبها انه يفضل صامد ومتواجد على أرضه.
وتابع السيسي: وإحنا هنبذل أقصي جهد عشان نخفف عنه، هنا بالنسبة للمصريين أنا عارف أن التحديات بقالنا من 2011 والظروف صعبة ومن أزمة لأزمة لكن عزائنا إن ربنا يسلم البلد من كل شر وسوء وإن كان الأمر مرتبط بحياة وتكلفتها لكن في فرق كبير جدا بين تكاليف حياة وبين إهدار حياة.
وأكد السيسي أن مصر هتفضل بفضل الله باقية صامدة قادرة بيكم أنتم ومحدش هيستطيع المساس بمصر إلا من خلالكم وقدرة مصر على تأمين نفسها وحماية نفسها بفضل الله كافية، لكن شعبها كمان هو كمان مسئول معانا على حفظ مصر وآمنها أوعوا حد يزين لكم أو يفتنكم ويخليكم .. كفاية خراب الدول الأخري.