قال الرئيس عبد الفتاح السيسي ، إن 17 مليون مشترك يحصلون على الكهرباء بربع ثمنها .
جاء ذلك على هامش جلسة خاصة بالبترول والكهرباء خلال مؤتمر حكاية وطن اليوم والذي انطلق اليوم السبت بالعاصمة الإدارية الجديدة.
وأضاف: “الكهرباء بتقطع لأن وزير البترول مش هيقدر يمنح وزير الكهرباء الغاز بالأسعار المدعومة لأنه محتاج دولار يجيب بيه البترول بتاعه “.
وتابع الرئيس السيسي: “مين يستحمل ؟ إحنا عايزين دولار علشان نشتري مشتقات .وعندنا إنتاج بناخده كله وكمان الإنتاج بتاع الشريك بناخده كله والشريك عايز فلوسه بالدولار وزير الكهرباء بيأخد حق الكهرباء بالجنيه ويسدد ثمن الغاز بالجنيه”.
وأضاف: “متعرفوش إن فيه 17 مليون مشترك بياخدوا الطاقة بأقل من ربع ثمنها، هو فيه حد بيدي حاجة بربع ثمنها ؟ .. انتوا مش واخدين بالكم خالص .. الموضوع مش واضح أبدا ..أنا بتكلم في التحديات التي تعوق استمرار الإنجاز وبتخلي الخناقة اللي بقول عليها بين وزير البترول والكهرباء مستمرة .. وزير البترول عايز فلوس ووزير الكهرباء عايز فلوس لانه بيبيع الطاقة بأقل من ثمنها”.
وتابع قائلا: “كان عندنا أزمة بوتجاز وغاز ووقود، .. كل مشكلة طلعت اتحطلها حلول اتكلفت مليارات .. اتعمل مستودعات بوتجاز علشان يبقى عندنا مخزون يكفي 60 يوا .. مابتتعملش الحاجات دي إلا إذا كانت البلد قاعدة تشتغل وتخطط وتنفذ تخطيطها بكفاءة وجدارة”.
وقال إن “النهاردة الإجراءات اللي اتعملت لرفع الدعم خلال الـ 5 سنوات الماضية انتهت وراحت ورجعنا تاني لنقطة الصفر نتيجة سعر الصرف اللي اتغير .. يعني بعد ما كنا بنقول دعمنا تراجع لكذا .. الدعم هيوصل لأرقام تانية إلى 120 مليار جنيه في السنة”.
وأضاف: “يرجع تاني وزير البترول عايز فلوسه علشان يشتري منتجاته من برة وأيضا يدي الشريك الأجنبي الموجود معانا حقه من الانتاج .. لو معملناش كدة وتوقفنا عن سداد تكلفة اللي خدناه من الشريك الأجنبي في البترول اللي طالع من عندنا مش هيشتغل معانا تاني”.
وتابع قائلا: “وزير الكهرباء بياخد الطاقة بأسعار مدعمة 3 دولار لكل مليون وحدة حرارية .. بينما وزير البترول بيبيعه في السوق المحلي بـ 7 دولارات وفي الخارج 12 دولارات على الأقل .. عايز أقول لو وقفنا قدام كل كلمة قالها وزير البترول في كل موضوع حتى الغاز اللي بنتكلم عليه عقبال ما اقنعنا الناس باستقرارنا وربنا وفقنا في حقل ظهر كان هيبقى عندنا أزمة كبيرة دلوقتي”.
وقال الرئيس السيسي: “. بمناسبة إنتاج الكهرباء .. ماكنش الأزمة في الكهرباء في الإنتاج فقط .. كانت في الإنتاج والنقل والتحكم .. بنتكلم في استثمارات 2 تريليون جنيه في الكهرباء .. ده كان لازم يجي بالسلف .. علشان خاطر عيون بلدنا يبقى بلدنا كلها تقف كدة علشان تسدد سلفها وديونها .. وزير البترول عايز الفلوس من وزير الكهرباء بالدولار ووزير الكهرباء ماعندوش .. أبيع بـ 12 دولار كاش ولا ابيع بـ 3 دولار وماخدهمش ولو خدتهم هاخدهم بالجنيه”.
مليون حادثة سرقة كهرباء في الشهر وقطع الكهرباء يوفر 300 مليون دولار شهريا
وأضاف: “وزير الكهرباء من يوم ما تولى المسئولية بيبعتلي شهريا تقرير عن حوادث سرقة الكهرباء .. مليون حادثة كل شهر .. مين اللي بيعمل ده ؟ كلنا .. 96 مليون واقعة سرقات كهرباء”.
وأكد أنه “وزير الكهرباء راجل عالم كبير جدا في الشغلانة .. وعارف انه ممكن يطلع يقول لو ادوني غاز هينتج كهرباء كافية .. طب ما تدفع اللي عليك .. انا بحكيلكم الحكاية وسايبلكم الحكم والكلام ده ينطبق على قطاعات الصناعة والزراعة واي قطاع فيه تنمية حقيقة للدولة لازم نكون عارفين اللي انا بقوله ده”.
وقال: ” لو القطاع ده بيدار بشكل استثماري قطاع البترول والغاز والكهرباء كنت تيجي النهاردة تقول لأي حد نزل شركات كهرباء سواء إنتاج أو توزيع أو نقل نزلها البورصة تجيبلك مليارات الدولار مش الجنيهات .. ولو نزلتها البورصة وقولت للمصريين اشتروا هيقولك الشركة دي بتكسب ولا لا ..لو احنا بننتج السولار والبنزين بتاعنا .. نقدر نوفر”.
وأضاف: “معايا أو مع غيري لو عايزين بلدكم تبقى تماما مالكمش غير الصبر والعمل والعمل حتى نتجاوز التحديات نقدر نخلي الكهرباء ماتقطعش . آه طبعا طيب وزير البترول يجيب منين ؟ وبنسيبه يبيع الغاز علشان يجيب البترول اللي بنخليه سولار وبنزين .. ده يوفر 300 مليون دولار .. الكهرباء اللي بتقطع دي بتوفر 300 مليون دولار شهريا”.