قال الرئيس عبد الفتاح السيسي، إنّ تكلفة تطوير قطاع النقل في مصر 2 تريليون جنيه، مواصلا: «عشان أقولكم ممكن يبقى عندنا شبكة مواصلات وسكك حديدية ومترو أو حتى أتوبيسات ترددية، كان لابد أصرف 2000 مليار جنيه».
وأضاف الرئيس السيسي، في تصريحات خلال تفقده الأكاديمية العسكرية المصرية، وأذاعتها قناة «إكسترا نيوز» الفضائية: «معملناش حاجة جديدة عشان إحنا عاوزين نعمل حاجة جديدة، لكن مكانش عندنا، الناس مهم تعرف إني بعمل عشان معنديش مش عشان الزيادة يعني».
وتابع: «أنتو مشفتوش القاهرة ومحستوش بيها لأن المسألة فيها اتحلت، لكن لو أنت شفت القاهرة في عامي 2011 و2012 وسبتها أنا وعشت معاكم زي ما هي كده، كان زمانها جراج، لكن حد يعرف كم بلغت تكلفة البنية الأساسية؟! مثل شبكة الطرق والنقل والمطارات والكهرباء والمياه والزراعة والمدارس والجامعات؟! هل حد يمكنه تقدير هذا الرقم؟! هل يعلم أحد إذا كانت تكلفة النقل تريليوني جنيه؟! الكهرباء كم؟! زيهم !.. حاولنا حل المسألة بعلم وخطة وتضحية وإلا مش هنخرج من اللي إحنا فيه ده أبدا».
وواصل السيسي: « خلال الـ 10 سنين اللي فاتوا كانوا عبارة عن تأهيل وإعداد بنية للدولة تستطيع أن تتفاعل، وتتعامل مع تنمية على مستوى دول نامية وليست دول متخلفة».
واستطرد: «لو تكلمت على مشكلة المياه، حجم المياه الذي نعالجها معالجة ثلاثية متطورة، المحطات التي اتعملت تكلفتها وصلت لكام وعملت قد أي مياه في السنة.. هناك 3 أمثلة، عملنا محطة المحسمة، تعالج مليون متر مياه في اليوم، ومحطة بحر البقر تعالج 5.7 مليون متر مياه في اليوم، ومحطة 3 مايو تطلع7.5 مليون متر في اليوم».
وتابع: المحطات دي هنستفاد منها أي، هنستفاد منها أن المياه الذي أعطاها لنا الله سبحانه وتعالى مش كتير، ونعاني من حالة فقر مائي لأن نستهلك 500 متر مكعب مياه في السنة للفرد، وهذا حد الفقر المائي، ومش هنقدر نزود المياه غير بحاجتين، معالجة المياه، او بتحلية المياه، من خلال أن نأخذ مياه البحر ونعملها تحلية ونستخدمها، ومش شايفين ان الأسعار بتتراجع بشكل كويس عشان نحس بالراحة، وبالتالي الـ10 سنوات اللي فاتت كانت كلهم جهد في بناء قدرة دولة للانطلاق».